ភ្នំពេញ៖ នាយខុទ្ទកាល័យលោក កឹម សុខា គឺលោក មុត ចន្ថា បានចោទគណបក្សភ្លើងទៀនថាមានលោក សម រង្ស៊ី នៅពីក្រោយនឹងកំពុងដើរចេញពីសម្ព័ន្ធភាពនយោបាយក្នុងអតីតគណបក្សសង្រ្គោះជាតិដោយចាត់ទុកថាជា «ល្បិចកលទុយ៌សរបស់ដៃគូលួចចាក់ពីក្រោយខ្នង» ។
ការលើកឡើងរបស់លោក មុត ចន្ថា នៅពេលនេះគឺបន្ទាប់ពីគណបក្សភ្លើងទៀនដែលធ្លាប់ជាអតីតគណបក្សសមរង្ស៊ីដែលដឹកនាំដោយលោក សម រង្ស៊ី បង្កើតតាំងពីខែវិច្ឆិកា ឆ្នាំ១៩៩៨ដល់ឆ្នាំ២០១២ បានប្រកាសធ្វើសមាជបក្សនៅថ្ងៃទី២៧ ខែវិច្ឆិកា ឆ្នាំ២០២១ ខាងមុខ «ដើម្បីធ្វើវិសោធនកម្មប្រការមួយចំនួននៃលក្ខន្តិកៈគណបក្ស រៀបចំជ្រើសតាំងសមាសភាពថ្នាក់ដឹកនាំគណបក្សអាណត្តិថ្មី និងកំណត់យុទ្ធសាស្ត្រនយោបាយគណបក្ស»។
លោក មុត ចន្ថា បានសរសេរនៅលើហ្វេសបុករបស់លោកថា គណបក្សភ្លើងទៀនដែលជាអតីតគណបក្សសមរង្ស៉ី និងទាំងគណបក្សសិទ្ធិមនុស្ស បានច្របាច់បញ្ចូលគ្នាទាំងរចនាសម្ព័ន្ធនិងទាំងកម្លាំងស្នូលនៅកម្រិតជាតិនិងមូលដ្ឋាន ដើម្បីបង្កើតទៅជា «គណបក្សសង្រ្គោះជាតិ» នៅខែកក្កដា ឆ្នាំ២០១២។ សូម្បីតែអតីតសមាជិកព្រឹទ្ធសភាក៏បានក្លាយជាសមាជិកគាំទ្រស្ថិតក្នុងក្រុមការងាររបស់គណបក្សសង្រ្គោះជាតិ នៅតាមបណ្តារាជធានី-ខេត្តទាំង២៥ផងដែរ។
លោកបន្ថែមថា ដើម្បីបង្ហាញនូវភក្ដីភាពចំពោះសម្ព័ន្ធមិត្តខ្លួនគណបក្សសិទ្ធិមនុស្សដែលជាគណបក្សបង្កើតឡើងដោយលោក កឹម សុខា សុខចិត្តរំលាយខ្លួននៅខែមករា ឆ្នាំ២០១៨ តែមិនត្រូវបានក្រសួងមហាផ្ទៃអនុញ្ញាតនោះទេ។
លោកបានសរសេរបន្ថែមថា៖ «យើងបានកត់សម្គាល់ឃើញថា គោលជំហររបស់គណបក្សភ្លើងទៀន និងគណបក្សសិទ្ធិមនុស្ស គឺខុសគ្នាទាំងស្រុង ដោយគណបក្សសិទ្ធិមនុស្សបានបង្ហាញជំហរផ្លូវការ ស្នើសុំរំលាយគណបក្សនេះនិងលុបចេញពីបញ្ជីរបស់ក្រសួងមហាផ្ទៃ ប៉ុន្តែគណបក្សភ្លើងទៀន បានព្យាយាមធ្វើឱ្យគណបក្សនេះដំណើរការឡើងវិញ តាមរយៈការប៉ុនប៉ងរៀបចំសមាជវិសាមញ្ញម្តងជាពីរដងរួចមកហើយ គឺលើកទីមួយគ្រោងធ្វើនៅថ្ងៃទី២២ ខែសីហា ឆ្នាំ២០២១ និងលើកទីពីរគ្រោងធ្វើនៅថ្ងៃទី២៧ ខែវិច្ឆិកា ឆ្នាំ២០២១ ខាងមុខ» ។
លោក មុត ចន្ថា លើកឡើងថា បើទោះពេលនេះលោក សម រង្ស៊ី មិនមែនជាប្រធានគណបក្សភ្លើងទៀនក្ដី តែវាពិបាកជឿណាស់ថាបក្សនេះគ្មានលោក សម រង្ស៊ី នៅពីក្រោយ។ លោកបញ្ជាក់ថាប្រសិនគណបក្សភ្លើងទៀន សម្រេចចូលរួមការបោះឆ្នោតខាងមុខ គឺប្រាកដណាស់លោក សម រង្ស៉ី នៅពីក្រោយ និងមានលោក អេង ឆៃអ៊ាង និងលោក យឹម សុវណ្ណ ដែលបុគ្គលទាំងពីរនាក់នេះគ្រប់គ្រងកម្លាំងនិងរចនាសម្ព័ន្ធនៃអតីតគណបក្សសមរង្ស៉ីនៅក្នុងគណបក្សសង្រ្គោះជាតិ។
លោកចាត់ទុកថា៖ «គណបក្សភ្លើងទៀនបានសម្រេចដើរចេញពីសម្ព័ន្ធភាពនយោបាយក្នុងអតីតគណបក្សសង្រ្គោះជាតិ ដែលលោក សម រង្ស៉ី ទន្ទេញជាប់មាត់ថាសម្ព័ន្ធភាពគណបក្សភ្លើងទៀន (អតីតគណបក្សសមរង្ស៉ី) និងគណបក្សសិទ្ធិមនុស្ស នៅតែរឹងមាំ ហើយគាត់ថែមទាំងបង្កើតដោយអត្តនោម័តិនូវពាក្យស្លោកៈ “សម រង្ស៉ី-កឹម សុខា ជាមនុស្សតែមួយ”។ នេះជាកលល្បិចរបស់ទុយ៌សដៃគូលួចចាក់ពីក្រោយខ្នង!»
អនុប្រធានគណបក្សភ្លើងទៀនលោក ចេប គឹមអ៊ាង បានប្រាប់ EAC News ថាការធ្វើសមាជរបស់គណបក្សភ្លើងទៀននៅចុងខែវិច្ឆិកាខាងមុខគឺធ្វើតាមលក្ខខន្តិៈរបស់គណបក្សដែលតម្រូវឱ្យធ្វើសមាជរៀងរាល់៣ឆ្នាំម្ដងតែប៉ុណ្ណោះ។ លោកបានច្រានចោលការចោទប្រកាន់របស់លោក មុត ចន្ថា ខណៈលោកបញ្ជាក់ថាគណបក្សភ្លើងទៀនពុំមានជាប់ពាក់ព័ន្ធនឹងសម្ព័ន្ធភាពនៃអតីតគណបក្សសង្គ្រោះជាតិ ហើយគណបក្សភ្លើងទៀននៅពេលនេះក៏គ្មានជាប់ពាក់ព័ន្ធអ្វីនោះទេមួយលោក សម រង្ស៊ី និងបក្សពួករបស់គាត់ដែរ។
លោកថា៖ «អ្នកថាចេះតែថាទៅតែរឿងពិតវាមិនមែនអញ្ចឹង!» ។
ចំពោះការចូលរួមក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់នៅឆ្នាំ២០២២ខាងមុខ លោក ចេប គឹមអ៊ាង នៅមិនទាន់អាចបញ្ជាក់បាននៅឡើយទេដោយរង់ចាំការធ្វើសមាជគណបក្សនៅចុងខែវិច្ឆិកាសិន។
អ្នកវិភាគបញ្ហាសង្គមលោកបណ្ឌិត មាស នី យល់ថាជារឿងធម្មតានៃអ្នកនយោបាយដែលតែងតែចោទប្រកាន់គ្នាបែបនេះ តែលោកយល់ថាការធ្វើសមាជរបស់គណបក្សភ្លើងទៀនគឺជាសិទ្ធិនយោបាយរបស់គណបក្សនេះមិនគួរណាមានការវាយប្រហារនោះទេ។
លោកថា៖ «មែនទែនទៅរឿងបើកគណបក្សអីមួយផ្សេងៗខ្ញុំនៅតែប្រកាន់តាំងពីដើមមកថាវាជាសិទ្ធិរបស់បក្សនីមួយៗ ប៉ុន្ដែប្រហែលគេអ្នកនយោបាយដែលជ្រុលនិយមទៅខាងណាមួយគេមើលឃើញខុសពីខ្ញុំ។ បើថាចម្លែកវាមិនចំឡែកទេសម្រាប់ខ្ញុំ។ រាល់ថ្ងៃនេះគេទើសគ្នាតែពីរឿងអ្នកនៅធ្វើអីមិនកើតស្រែកឱ្យអ្នកទៅ ហើយអ្នកទៅបន្ទោសអ្នកនៅហ្នឹងថានៅធ្វើអីទៀត? »
ក្រោយការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីឆ្នាំ២០១២ គណបក្សសមរង្ស៊ីដែលដឹកនាំដោយលោក សម រង្ស៊ី និងគណបក្សសិទ្ធិមនុស្សដែលដឹកនាំដោយ កឹម សុខា បានច្របាច់បញ្ជូលគ្នាបង្កើតជាគណបក្សសង្គ្រោះជាតិដើម្បីចូលរួមការបោះឆ្នោតជ្រើសរើសសមាជិកសភាឆ្នាំ២០១៣។ ទោះជាយ៉ាងណាក្រោយពីគណបក្សសង្គ្រោះជាតិត្រូវបានរំលាយដោយតុលាការកំពូល សម្ព័ន្ធភាពនៃគណបក្សបានបែកបាក់ជាច្រើននិងបានបង្កើតជាគណបក្សជាបន្តបន្ទាប់ដើម្បីចូលរួមក្នុងការបោះឆ្នោតខាងមុខ ខណៈគណបក្សដើមគឺគណបក្សភ្លើងទៀន(អតីតបក្សសមរង្ស៊ី) និងគណបក្សសិទ្ធិមនុស្សមិនទាន់មានជំហរយ៉ាងណានៅឡើយទេ៕
